Die Gees: Ten volle God in die Gewone
Ons reis deur “Gees in die Gewone ” lei ons na ‘n klimaks-onthulling: die Heilige Gees is die lewende asem van God self in ons. Sedert die Skepper se asem by die skepping, tot Jesus se uitasem oor sy dissipels, is die Gees die hartklop van God se teenwoordigheid – nooit afwesig nie, ook nie nou nie.
Jy is ook met Goddelike asem gevul. Dit maak van jou God se lewende tempel . Danksy die Gees ervaar ons God in Sy volheid: Sy liefde, geregtigheid, trou en krag word persoonlik geken.
Die Heilige Gees is veel meer as ons Helper . Hy is die Opstandings-Krag wat jou van binne bemagtig om elke oomblik as heilig te leef. Hy is SPIRITUS VIVUS : Hy vernuwe jou, transformeer jou begeertes, en gee jou die vrymoedigheid om met bruisende blydskap jou lewe as ‘n avontuur saam met God uit te leef. Hy verander hooploosheid in lewende hoop , want Hy is die Goddelike deposito in ons harte – die onwrikbare waarborg dat ons erfgename van God saam met Jesus is.
Mag jy vandag en elke dag kies om onder die leiding van die Gees te leef. Mag jou hele lewe ‘n voortdurende, heerlike loflied tot God die Vader word.
Onthou:
“Die genade van die Here Jesus Christus, die liefde van God en die gemeenskap van die Heilige Gees is met julle almal!” – 2 Korintiërs 13:13
ANKERGEDAGTE: Die Gees bemagtig jou om elke oomblik as God se lewende loflied te leef.
Gebed: Heilige Gees, dankie dat U die lewende asem van God in my is. Mag my hele wese ‘n voortdurende, heerlike loflied tot God die Vader word. Amen.
DEEL B (vir diegene met meer tyd) :
Lees: Efesiërs 1:13-14 en 2 Korintiërs 3:17-18 . Hoe beïnvloed hierdie waarheid van die teks jou daaglikse lewe en jou siening van die toekoms?
Kruisverwysings vir verdere studie:
- Psalm 139:7-10 : Die Gees se alomteenwoordigheid.
- Johannes 14:26 : Die Gees as ons Leermeester.
- Romeine 8:11 : Die Gees wat lewe gee aan ons sterflike liggame.
- Galasiërs 5:25 : Leef en wandel deur die Gees.
MUSIEKKEUSE VIR VANDAG:
Hierdie reeks – wat vir my werklik ‘n geestelike verryking was om te skryf – sluit ek af met ‘n vrolike tradisionele Afro-Amerikaanse spiritual gesing deur ‘n sanggroep van St Augustine by-the-sea. Die name van die groep verskyn in die onderskrif van die skakel.
Ek dank jou dat jy hierdie reeks “Spiritus Vivus” – Die Gees wat Lewend maak – saam met my gevolg het. Dankie vir soveel ondersteuning op verskeie maniere! Dankie ook aan elkeen wat as ‘n donateur van hierdie bediening ondersteuning bied. As dit vir jou betekenisvol was, oorweeg dit tog om die bediening te ondersteun, hoe klein die bedrag ook al mag wees. BANKBESONDERHEDE: STANDARD BANK; TAKKODE 051001; REK NO: 08240027085; REK NAAM: RM BEZUIDENHOUT