(5 April – Opstandingsondag)
Genade maak nuutheid moontlik
Genade en dankbaarheid hoort bymekaar soos hemel en aarde. Dankbaarheid volg op genade soos ‘n donderslag op weerlig. (Karl Barth)
> 
“Lofwaardig is die God en Vader van ons Here Jesus Christus! Dit is Hy wat ons in sy groot ontferming, deur die opstanding van Jesus Christus uit die dood, opnuut verwek het, sodat ons ’n lewende hoop mag hê.” (1 Pet 1:3)
Paassondag herinner ons dat genade nooit net ’n mooi woord of ’n godsdienstige idee is nie. Genade is God se lewende krag wat nuwe lewe oopbreek waar ons net eindes sien.
Die opstanding van Jesus verander die manier waarop ons na ons eie lewe kyk. Ons hoef nie vir altyd vas te sit in gister se mislukkings, vrese of teleurstellings nie. God se genade bring ’n nuwe begin.
Daarom kan Petrus met soveel vreugde uitroep: “Nou reeds het ons ‘n lewende hoop!”
Paasfees beteken dat ons lewe nie vasgesluit bly in die grafte van skuld, spyt of moedeloosheid nie. Waar Jesus opstaan, word nuwe lewe moontlik – ook in ons. G En waar genade ons aanraak, begin dankbaarheid spontaan groei.
Van watter genade is jy vandag in jou lewe bewus, en hoe kan jy met dankbaarheid daarop reageer?
Jesus, my Here, laat U opstanding vandag nuwe hoop in my wakker maak. Help my om met ’n dankbare hart te leef en my lewe oop te hou vir die nuwe begin wat U gee.