40 DAE VAN OORWINNING
#36 – 31 Mrt
> 
OORWINNING OOR SKAAMTE
“Toe die soldate Jesus dan gekruisig het, het hulle sy boklere gevat en dit in vier dele verdeel, vir elke soldaat ‘n deel. Hulle het ook sy onderkleed gevat.” – Johannes 19:23
Kruisiging was nie net ’n doodsvonnis nie; dit was openbare vernedering. Die veroordeelde is ontklee, uitgelewer, ten toon gestel. Skaamte was deel van die straf – om alles wat jou bedek en beskerm, weg te neem. Om kwesbaar te hang voor oë wat staar en spot.
So hang Jesus. Ontbloot. Weerloos.
Ons ken ook skaamte – oor wat ons gedoen het, oor wat ons nagelaat het, oor dele van onsself wat ons wegsteek. Skaamte fluister: Bly weg. Moenie raakgesien word nie.
Maar Christus bly sigbaar. Hy vlug nie. Hy dra selfs dit wat ons laat wegkruip.
En onder daardie oop hemel besef ons: Hy het niks teruggehou nie – nie eens sy waardigheid – sodat ons nie meer hoef weg te kruip nie.
Gebed:
> Here Jesus,
> U het ontbloot en verneder gestaan.
> U ken my skaamte, my wegsteek, my vrees.
> Waar ek myself verberg,
> roep U my nader.
> Waar ek skuldig en klein voel,
> bedek U my met genade.
> Leer my om nie meer weg te kruip nie, maar in U liefde te bly staan. Amen.
Hierdie dagstukke verg tyd en hulpbronne om te skep en te deel. Ek wil dit gratis hou vir almal, maar as jy die vermoë het om te help dra, maak jou ondersteuning ’n tasbare verskil. Dankie dat jy deel is van die gemeenskap wat dit moontlik maak. My bankbesonderhede is: STANDARD BANK; TAKKODE: 051001; REK NO: 080042805; REK NAAM: R M Bezuidenhout