Genade verander
“Genade is nie gekant teen inspanning nie; dit is gekant teen die illusie van verdienste.” – Dallas Willard
> 
” _As iemand in Christus is, is hy ’n nuwe skepping; die ou dinge het verbygegaan, kyk, dit het alles nuut geword.” (2 Kor 5:17.)
Ons dink soms genade beteken God vergewe ons net en laat ons dan verder aangaan soos voorheen. Maar genade doen iets meer ontstellend: dit verander ons.
Wanneer genade jou raak, begin iets nuuts stadig groei. Jy reageer anders waar jy voorheen kwaad geword het. Jy is nie meer so liggeraak of ongeduldig nie. Jy hou vas aan hoop waar jy vroeër moed opgegee het. Jy sien mense anders. Jy dink anders oor die lewe. Jy spandeer jou tyd op ander maniere as voorheen.
Dit gebeur selde dramaties. Meestal gebeur dit stil — soos ’n saad wat onder die grond ontkiem.
Dalk is dit juis hoe God vandag in jou werk.
* 
Waar sien jy tekens dat God jou van binne besig is om te verander?
Here, dankie dat U genade my nie los waar ek is nie. Laat u Gees my hart en my gedagtes vernuwe. Vorm my lewe sodat ander iets van Christus in my woorde en my dade kan sien.