Genade bly soekend
“Daar is niks wat ons kan doen dat God ons meer lief kan hê nie – en niks wat ons kan doen dat Hy ons minder lief sal hê nie.” – Martin Luther
> 
_“Die Seun van die Mens het gekom om diegene wat verlore is, te soek en te verlos.” (Lukas 19:10)_
Baie mense leef met die idee dat hulle eers moet wys dat hulle goed genoeg is om God se liefde te verdien. As ons beter leef, beter bid, meer glo, minder foute maak – dán sal God ons aanvaar.
Maar die evangelie sê iets radikaal anders. Jesus sê Hy het gekom om te soek en te red wat verlore is. Dit beteken dat God se liefde nie begin wanneer ons reg is nie; dit begin lank voor dit.
Genade werk nie soos ’n beloning vir goeie mense nie. Dit is God se liefde wat na ons toe kom juis wanneer ons dit die nodigste het.
Niks wat ons doen kan God se liefde groter maak nie; en niks wat ons verkeerd doen kan dit vernietig nie.
Die Opgestane Christus bly ’n soekende Here. Hy kom vandag nog na mense toe wat dink hulle is te ver weg.
Waar in jou lewe probeer jy dalk – selfs onbewustelik – nog God se liefde verdien in plaas daarvan om dit eenvoudig te ontvang?
Here Jesus, dankie dat U my liefhet nog voordat ek alles regkry. Help my om op te hou probeer verdien wat U reeds vrylik gee. Leer my om U genade eenvoudig te ontvang en daarin te leef. Amen.