40 DAE VAN OORWINNING
#8 – 26 FEB
> 
*OORWINNING OOR BITTERHEID
“Wees vriendelik en vol deernis teenoor mekaar; vergewe mekaar soos God julle in Christus vergewe het.” – Efesiërs 4:32
Bitterheid begin dikwels klein: ’n onregverdige oomblik, ’n kwetsende woord of ’n onverwerkte seer. Stilweg groei dit tot ’n wortel wat jou hele binneste versuur. Ons hou soms aan bitterheid vas omdat dit soos ’n beskermende skild teen verdere pyn voel, maar uiteindelik word dit ’n swaar ketting wat jou aan jou oortreder vasketting.
Aan die kruis kies Jesus egter nie vir wraak nie, maar vir die radikale pad van vergifnis. Sy uitroep, “Vader, vergeef hulle,” weerklink nie nadat die onreg reggestel is nie, maar terwyl die spykers nog deur Sy hande dring. Dit is nie goedkoop emosie nie, maar duur genade. Oorwinning oor bitterheid beteken nie dat jy die pyn as onbelangrik afmaak nie; dit beteken jy weier dat jou toekoms deur jou verlede gyselaar gehou word. Vergifnis verklaar nie die ander persoon onskuldig nie, maar dit verklaar jou uiteindelik vry. Liefde wen nie deur geweld nie, maar deur selfoorgawe.
GEBED:
> Here, ek bring my bitterheid en my seer na U toe.
> Dankie dat U my vergewe het, selfs toe ek dit nie verdien het nie.
> Gee my die genade om ander los te laat.
> Bevry my hart van harde gedagtes.
> Leer my om lief te hê soos U liefhet. Amen.
—–
Aan die einde van elke maand moet ek met my hoed in my hand voor jou kom staan – hierdie bediening kan nie sonder donateurs volhoubaar aangebied word nie. As hierdie dagstukke vir jou betekenisvol is, wil jy nie oorweeg om dit finansieel te ondersteun nie. Dit maak nie saak hoe groot of klein die bedrag is nie. Tesame maak elke druppel die bekertjie vol. My besonderhede is: STANDARD BANK; TAKKODE: 051001; REK NO: 080042805; REK NAAM: RM BEZUIDENHOUT.