Die Gees: Waag Saam Die Sprong!
Gemaksones is dalk veilig, maar dit weerhou jou van voluit lewe. Dink aan Petrus: wat sou gebeur het as hy nooit sy vissersboot agtergelaat het nie? Hy sou storms vermy het, ja, maar hy sou ook nooit op golwe geloop het nie. Hoe leer jy ooit die Een ken wat storms stilmaak, as jy nie saam met Sy Gees op die stormagtige see is nie?
Die Spiritus Vivus – die Gees wat lewend maak – wil jou kragtig gebruik, net soos 'n Petrus. Ons het immers nie "'n gees van vreesagtigheid ontvang nie, maar van krag en liefde en selfbeheersing" (2 Timoteus 1:7). Die Gees is die inwonende Krag wat jou aan die hand gryp op die golwe, jou onsekerhede verander in Goddelike vertroue.
Mag ons gemaksones ons nie daarvan weerhou om aktiewe deelnemers in God se groot avontuur te wees nie. Vat die hand van die Gees en spring!ANKERGEDAGTE: Die Gees bemagtig ons om ons veilige hawe te verlaat en God se wonder op die golwe te beleef .
Gebed: Heilige Gees, vul my met U krag om vreesloos deel te neem aan U avontuur van die lewe.
DEEL B (vir diegene met meer tyd):
Lees Matteus 14:22-33 en Hebreërs 11:6. Dink na oor ‘n situasie in jou lewe waar jy in ‘n “gemaksone” vasgevang voel, maar God jou moontlik uitnooi om ‘n risiko vir Sy Koninkryk te neem.
Kruisverwysings vir verdere studie :
- Johannes 15:26-27 : “Maar wanneer die Trooster kom, wat Ek vir julle van die Vader sal stuur, die Gees van die waarheid wat van die Vader uitgaan, sal Hy van My getuig. En julle sal ook getuig, omdat julle van die begin af by My is.”
- Filippense 2:13: “Want dit is God wat in julle werk, om te wil sowel as om te werk, na sy welbehae.”
- Lukas 12:11-12 : “En wanneer hulle julle voor die sinagoges en die owerhede en die magistrate bring, moenie julle kwel oor hoe of wat julle moet antwoord of wat julle moet sê nie; want die Heilige Gees sal julle in daardie uur leer wat julle moet sê.”
MUSIEKKEUSE VIR VANDAG:
” Veni Creator Spiritus ” is ‘n bekende lied wat in Pinkstertyd deur die eeue gesing is. In hierdie weergawe het die bekende Vader John Michael Talbot die Engelse lirieke besonder treffend in ‘n kontemplatiewe lied verwerk. (Die lirieke verskyn in die video.)