Lig in die Winter

9 – Méér as antwoorde (13 Jul)

⁠📖 “My genade is vir jou genoeg. My krag kom juis tot volle werking wanneer jy swak is.” 2 Korintiërs 12:9  

Wanneer pyn lank aanhou, verander ons gebede. Aanvanklik vra ons vir uitkoms. Later vra ons net: Waarom? Ons verlang na antwoorde wat die legkaart van ons lewe laat sin maak.

Paulus bid ook só. Drie keer vra hy dat sy “doring in die vlees” weggeneem moet word. God sê nie ja nie. Hy gee iets groter: “My genade is vir jou genoeg.” Die wonderwerk was nie dat die doring verdwyn het nie, maar dat God se genade groter geword het as sy swaarkry.

Dieselfde ontdek Moses wanneer hy bid: “As U nie self saamgaan nie, moet U ons nie van hier af laat wegtrek nie” (Eks. 33:15). Uiteindelik is God se teenwoordigheid belangriker as die pad vorentoe.

Met die jare leer ons dat sommige vrae nooit beantword word nie. Tog kan ons met vrede verder leef, nie omdat ons alles verstaan nie, maar omdat God self saam met ons stap.

🔌 BYBELSTUDIE
⁠Job 38:1–7 en Psalm 73:25–26
⁠Sien raak hoe die fokus skuif van die ‘waarom’ na die ‘Wie’.

☝🏼Watter vraag in jou lewe het nooit ‘n antwoord gekry nie, maar waar jy tog God se teenwoordigheid leer ken het?

🙏🏽 Here, ek verlang dikwels na antwoorde. Maar leer my dat U teenwoordigheid soms ‘n groter geskenk is as verduidelikings. Amen.