Dit is nie asof Job insae in die gesprek “agter die gordyne” gehad het (in Job 1-2) waar die satan met God onderhandel het nie. Job is fyngemaal deur die lewe. (Of was dit dalk deur God?) Kyk ons om ons, dan sien ons dit daagliks. As ons maar net kan verstaan waarom God alles toelaat. Dalk is die enigste gevolgtrekking tog die een waarby die digter, Adam Small, uitkom: “Die Here het ga’skommel en die dice het verkeerd geval.”
Ons sê so maklik, “Life happens”. Dis nou maar hoe die lewe is. G’n wonder daar is soveel mense op hierdie aardbol wat, soos Elihu Job beskuldig, ook wil sê, “Dit baat ‘n man nie as hy ‘n goeie verhouding met God het nie” (34:9, 2020-vertaling). Of soos dit in ‘n ander vertaling staan: “Ek mors my tyd om God tevrede te stel” (vgl NLV). God doen buitendien net wat God wil. Of, in Job se woorde: “Eintlik is dit om ‘t ewe, daarom dink ek: of ‘n mens skuldig is of onskuldig, God vernietig jou tog” (9:22).
Ek glo een van die waardevolste lesse wat ons uit die boek van Job kan leer, is dat ons werklik rou-eerlik met ons worstelinge mag wees. Ons mag (en kan en moet) stoei met God. Immers is die uitnodiging van God se kant af duidelik: “Kom tog, laat ons die saak met mekaar uitmaak, sê die Here” (Jes 1:18).
Ek dink die skrywer, Philip Yancey, is reg wanneer hy in sy boek, “Where is God when it hurts”, skryf: “The point of the Book of Job is not suffering: where is God when It hurts? … The point of the Book of Job is faith: Where is Job when it hurts?”
Job wou net nie moed opgee nie! Allermins sou hy moed opgee met God. Daarvoor sou God sorg.
GEBED: Dankie dat ek met al my worsteling na U mag kom sonder om te vrees.
MUSIEK:
Pinkster in Kaapstad sou nie dieselfde gewees het sonder die kinderkoor nie. Hier het ons die voormalige ‘Idols SA’-finalis Daylin Sass, begelei deur die Kaapstadse Kinderkoor, wat “Baba Yethu” uitvoer, ‘n baanbrekende stuk wat deur Christopher Tin gekomponeer is.
Die lied se lirieke is ‘n Swahili-vertaling van die Onse Vader, wat ‘n unieke en ryk kulturele dimensie aan ‘n tydlose Christelike gesang bring. “Baba Yethu” is gevier vir sy outentieke voorstelling van Afrika-musiek en sy vermoë om kulturele gapings te oorbrug, wat gehore wêreldwyd bekendstel aan die skoonheid van die Swahili-taal en Afrika-musiektradisies. Gekomponeer deur Christopher Tin Tenoor: Daylin Sass Die Kaapstadse Kinderkoor gedirigeer deur Cathy-Jane Mintoor