DIE TAFEL (#4 – 6 Aug)
VREDE VOORDAT DIE STORM VERBY IS
📖 ” Vrede laat Ek vir julle na; my vrede gee Ek vir julle. Ek gee nie soos die wêreld gee nie. Julle moet nie ontsteld wees nie en julle moet nie bang wees nie .” (Johannes 14:27)
🍞 PROE DIE BROOD
Christus gee nie sy vrede wanneer die storm verby is nie; Hy gee dit terwyl die storm nog op pad is .Aan die tafel was daar ‘n doodse stilte. Almal het geweet iets gaan gebeur. Jesus het dit al vooraf verduidelik. En nou het die aand aangebreek.
Judas is reeds op pad om Hom te verraai.
‘n Paar uur later sal Petrus Hom verloën.
Die dissipels gaan uitmekaar vlug.
En tog is Jesus se woorde nie vol angs of verwyt nie.
Hy sê eenvoudig: “My vrede gee Ek vir julle.”
Jesus wag nie totdat sy dissipels sterk genoeg is voordat Hy sy vrede uitdeel nie.
Hy gee dit aan mense wat binne enkele ure gaan struikel.
Dalk wag jy ook totdat jou lewe rustiger, jou geloof sterker of jou hart sekerder voel voordat jy glo Christus se vrede is vir jou.
Maar aan sy tafel ontdek ons iets anders.
Sy vrede is nie die beloning vir mense wat alles reg doen nie.
Dit is die geskenk van ‘n getroue Verlosser aan mense wat Hom nodig het.
💎 ONTDEK DIE SKAT• Lees Johannes 13–17.
Johannes 14 vorm deel van Jesus se afskeidsrede tydens die laaste maaltyd. Dit is opvallend dat sy belofte van vrede tussen twee pynlike aankondigings staan: Judas se verraad (13:21–30) en Petrus se verloëning (13:36–38).
Dit verander hoe ons vers 27 lees.
Jesus belowe nie vrede omdat Hy dink sy dissipels gaan getrou bly nie.
Hy belowe vrede omdat Hy getrou gaan bly.
Die Griekse woord eirēnē dra die betekenis van die Hebreeuse shalom—heelheid, herstel en lewe in gemeenskap met God. Jesus belowe dus veel meer as innerlike kalmte. Hy gee die sekerheid dat ons verhouding met God veilig in Hom rus.
En let op wat ná die opstanding gebeur.
Wanneer Jesus sy dissipels weer ontmoet, is sy eerste woorde: ” Vrede vir jull e!” (Johannes 20:19)
Nie verwyte nie.
Nie beskuldigings nie.
Dieselfde vrede.
Dit is die hart van die evangelie.
• Lees ook: Romeine 5:1–2 en Johannes 20:19–22.
🙏 Here Jesus, dankie dat U my vrede gee, nie omdat ek sterk is nie, maar omdat U getrou is. Laat ek vandag in daardie vrede leef. Amen.🌱 GROEIPUNT
• Waar wag jy dat alles eers reg moet wees voordat jy God se vrede kan ontvang?
• Hoor vandag weer Christus se woorde: ” My vrede gee Ek vir jou .”