40 DAE VAN OORWINNING
#23 – 16 Mrt
> 
OORWINNING OOR VERGELYKINGS MAAK
“Laat elkeen sy eie werk toets, en dan sal hy net oor homself kan roem.” – Galasiërs 6:4
Om jou lewe altyd teen ander te vergelyk steel lewensvreugde. Êrens gaan jy tekort skiet, want daar gaan altyd iemand wees wie se lewe blinker voel as jou eie: suksesvoller; gelukkiger; beter omstandighede.
Jesus leef anders. Hy jaag nie iemand anders se roeping na nie. Hy is getrou aan Sy eie sending. Dit maak Hom vry om ander te dien sonder om Homself te verloor.
Lydenstyd nooi ons om met eerbied te kyk, ook na waar God met ons eie lewens besig is. God werk nie net in ander mense se lewens nie; Hy werk ook in joune.
Oorwinning oor vergelyking beteken nie jy word skielik net tevrede nie. Dit beteken jy begin jou eie lewe as heilig beskou. Jy laat God toe om jou storie te skryf sonder om dit langs iemand anders s’n te hou.
Jou lewe hoef nie iemand anders s’n te wees om betekenisvol te wees nie. God is net so aktief in jou pad.
GEBED:
> Here, ek raak soms ontevrede as ek my lewe met ander s’n vergelyk.
> Leer my om my eie lewenspad te eerbiedig as ‘n instrument vir U.
> Help my om ander te vier sonder om myself te verloor.
> Bevry my hart van enige jaloesie. Amen.