PADLANGS #7 – 10 Feb.

PADLANGS #7 – 10 Feb.

> DIE HEILIGHEID VAN RUS

Markus 6:31 – “Kom julle self eenkant toe na ’n verlate plek en rus ’n bietjie.”

Die dissipels was so besig met Jesuswerk dat hulle “selfs nie tyd gehad het om te eet nie” (Markus 6:31a). Mense sou regtig beïndruk kon wees. Maar Jesus is anders – Sy reaksie was nie “werk nóg ‘n bietjie” nie; Hy neem hulle eenkant; weg van die skare. Nie omdat die werk klaar is nie, maar omdat hulle broos is.

Dit is skaars Februarie, maar jou program is dalk reeds so oorvol dat jy vergeet om asem te haal. Dissipelskap beteken om Jesus ook na die “verlate plekke” van rus te volg. Soms is die mees gehoorsame stap nie nog ’n aktiwiteit nie, maar die nederigheid om eenkant toe te gaan en bloot te wees.

As Jesus vandag vir jou sê: “Kom eenkant toe en rus ’n bietjie,” watter afspraak of taak sal jy moet kanselleer om Hom te gehoorsaam?

Here Jesus, dankie dat U my perke ken en respekteer. Help my om vandag U uitnodiging na rus te aanvaar sonder om skuldig te voel. Amen.

VIR DIEPER DUIK: Vandag, in die oudio-gesprek, kyk ons na die “Heilige Ritme” waarvoor jy ontwerp is en hoekom Jesus Sy dissipels beveel het om te stop terwyl die werk nog aan die gang was.