DIE KUNS VAN WAG: 
1
> 
– Romeine 15:13: Die God van hoop sal julle met alle vreugde en vrede vervul in julle geloof, sodat julle oorvloedig kan wees in die hoop deur die krag van die Heilige Gees.
> 
– Ons grootste fout in die kuns van wag, is om te glo dat God se seën aan die EINDE van die wagtyd lê, en nie binne-in die wagtyd nie.
Ons is geneig om die lewe te sien: eers die donkerte, dan die lig. Maar Paulus onthul in Romeine dat God se hoop, vreugde, en vrede reeds aktief is terwyl ons wag. Advent is nie ‘n blote tydsverloop wat ons moet verduur net om by Kersfees uit te kom nie; dit is ‘n proses waarin die Heilige Gees besig is om ons lewens te vorm. (Sien Galasiërs 5:16-25.)
Ware hoop is ‘n daaglikse belegging in geloof. Dit is nie gebaseer op wat ons met ons oë om ons sien nie, maar op God se betroubare aard (Hebreërs 11:1 is hier relevant). Elke nuwe dag wat ons toelaat dat hierdie sekerheid ons vul, word die wag minder van ‘n las, en meer van ‘n bevoorregte posisie. Ons kan vandag al oorvloedig wees in hoop (Vergelyk Romeine 5:5).
> 
– Dink vandag aan drie dinge wat jy, ten spyte van jou omstandighede, nog steeds kan verwag, omdat God dit beloof het.
> 
Heilige Gees, kom vul my met die vreugde en vrede wat my toelaat om vandag, in die wag, oorvloedig te wees in U hoop.